Чавушоглу - Конаковиќ: „Тимовите од Босна и Херцеговина спасија 26 лица од под урнатините“

АНКАРА (АА) - Туркије и Босна и Херцеговина работат заедно на унапредување на нивните длабоко вкоренети билатерални односи, изјави денеска турскиот министер за надворешни работи, Мевлут Чавушоглу, јавува Анадолу.

„Чувствуваме големо ниво на наклонетост кон нас од Босна и Херцеговина“, рече Чавушоглу на прес-конференцијата со министерот за надворешни работи на Босна и Херцеговина, Елмедин Конаковиќ во главниот град Анкара.

Чавушоглу рече дека Конаковиќ ја посетил Туркије за да ја покаже солидарноста на Босна и Херцеговина со Туркије, откако минатонеделните земјотреси ги однесоа животите на речиси 35.420 лица досега.

Земјотресите со јачина од 7,7 и 7,6 степени, со епицентар во областа Кахраманмараш, погодија над 13 милиони луѓе во десет области, Хатај, Кахраманмараш, Газиантеп, Адана, Адијаман, Дијарбакир, Килис, Малатија, Османије и Шанлиурфа.

Неколку земји во регионот, од кои најкатастрофално Сирија, ги почувствуваа силните потреси.

„Три тима за пребарување и спасување со 234 лица од Босна и Херцеговина дојдоа во Туркије веднаш по земјотресот. Тие работат напорно во Хатај, Адијаман и Кахраманмараш и од 12 февруари спасија 26 лица од под урнатините“, изјави Чавушоглу.

„Туркије минува низ тешки времиња, но солидарноста што ја гледа од целиот свет ѝ дава сила на нацијата“, додаде тој.

„Заедно работиме на дополнително зајакнување на нашите историски и културни врски со Босна и Херцеговина. Придаваме големо значење на мирот, просперитетот и стабилноста на Босна и Херцеговина. Силно го поддржуваме нејзиниот суверенитет и територијален интегритет“, нагласи министерот.

„Вкупно 7.846 странски персонал од 100 земји моментално работат во зоната на катастрофата, а се очекува уште две земји да испратат спасувачки тимови“, рече Чавушоглу.

Од своја страна, Конаковиќ рече дека Босна и Херцеговина е со Туркије и турскиот народ.

„Ние не сме земја со силна економија, но уште еднаш ги покажавме нашите чувства и заедништво со турскиот народ“, додаде тој.

Тој, исто така, се надева на дополнително подобрување на билатералните односи со Туркије.

Подоцна се очекува Конаковиќ да го посети Хатај за да се сретне со тимовите за пребарување и спасување од Босна и Херцеговина.