УЕФА Лига на шампиони: Челси го совлада Атлетико Мадрид, Баерн Минхен подобар од Лацио

ИСТАНБУЛ - Во реванш-средбите од осминафиналето на УЕФА Лигата на шампиони, Баерн Минхен со победата над Лацио од 2:1 и Челси со победата над Атлетико Мадрид со 2:0, изборија пласман во четвртфиналето, пренесува Агенција Анадолија (АА).

Во Лигата на шампиони, најпрестижното фудбалско клупско натпреварување во Европа, синоќа се одиграа последните две реванш-средби од осминафиналето.

Баерн Минхен во натпреварот против Лацио влезе со предност од 4:1 што ја оствари на првата средба. Натпреварот се одигра на стадионот „Алијанс Арена“ во Минхен.

Баерн поведе со 1:0 по голот што Роберт Левандовски го постигна во 33. минута со удар од белата точка, резултат со кој се замина на полувреме. Во 73. минута Ерик Шупо-Мотинг постигна гол за водство на Баерн од 2:0.

Лацио, единствениот погодок го постигна во 83. минута, намалувајќи го резултатот на 2:1 преку Марко Пароло. Со овој резултат заврши натпреварот и Баерн Минхен обезбеди пласман во четвртфиналето.

Баерн Минхен со својот 19. пласман во четвртфиналето на Лигата на шампиони е рекордер на тоа поле.

- Челси не дозволи изненадување -

На втората реванш-средба што се одигра синоќа, Челси на стадинот „Стемфорд Бриџ“ го пречека Атлетико Мадрид. Челси на првата средба како гостин го совлада Атлетико Мадрид со 1:0.

Челси поведе до 1:0 во 34 минута преку Хаким Зијеш, а Емерсон Палмиери ги постави конечните 2:0 во судиското продолжение 90+4. Со оваа победа Челси е осмата екипа која избори пласман во четвртфиналето на ЛШ.

Стефан Савиќ од Атлетико Мадрид во 81. минута доби црвен картон и својата екипа ја остави со 10 играчи.

Порто, Борусија Дортмунд, ПСЖ, Ливерпул, Реал Мадрид, Манчестер Сити, Баерн Минхен и Челси се екипите што се пласираа во четвртфиналето на Лигата на шампиони.

Извлекувањето на паровите од четвртфиналето и полуфиналето на УЕФА Лигата на шампиони ќе се одржи в петок на 19 март.