Турција: Порака „Hello Brother“ до Нов Зеланд од фудбалерите на Медипол

ИСТАНБУЛ (АА) - Фудбалерите на турскиот клуб Медипол Башакшехир не ги заборавија загинатите во терористичкиот напад изведен минатата недела врз две џамии во Нов Зеланд, јавува Anadolu Agency (AA).

Портокалово-сините преку својот профил на социјалните мрежи објавија видео, во кое фудбалерите Робињо, Стефано Наполеони, Ѓокан Инлер и Демба Ба ги повторија последните зборови на починатиот во терористичкиот напад, Давуд Наби, „Hello Brother“ (Здраво, брате).

Во видеото, сенегалскиот фудбалер Демба Ба вели „Многу ми е жал за она што се случи во Нов Зеланд. Ви го изразувам моето сочувство. Знајте дека ние сме заедница која е едно тело. Со сето срце сме со вас. Ви посакуваме сѐ најдобро.“