Познати седум од осумте парови во плејофот на НБА

ИСТАНБУЛ

Синоќа се одиграа четири натпревари во американската Национална кошаркарска лига НБА. Во Источната конференција актуелниот шампион Торонто Репторс ја совлада Филаделфија Севентисиксерс со 125:121 и ја извојува 52. победа сезонава, известува Агенција Анадолија (АА).

Најпрецизни кај Репторси беа Крис Боучер и Кајл Лоури со по 19 поени и Норман Пауел со 17 поени.

Во редовите на Севентисиксерси кои се наоѓаат на 6. позиција во Источната конференција, со просек од 42 победи и 30 порази, најпрецизен беше Тобијас Харис со 22 поени и турскиот интернационалец Фуркан Коркмаз со 21 поен.

- Познати паровите во плејоф-натпреварите, освен противникот на Лејкерс

Приближувајќи се кон крајот на нормалниот дел од сезоната во НБА, познати се седум од осумте парови кои ќе играат во плејоф-натпреварите во двете конференции.

Лидерот на Источната конференција, Милвоки Бакс, се среќава со осмопласираниот Орландо Меџик, а второпласираниот Торонто Репторс ќе игра против седмопласираниот тим на Бруклин Нетс. Третопласираниот Бостон Селтикс се среќава со шестопласираната Филаделфија Севентисиксерс, додека четвртопласираниот Мајами Хитс ќе ги одмери силите со петтопласираната Индијана Пејсерс.

Во Западната конференција екипите на Портланд Треил Блејзерс, Мемфис Гризлис, Феникс Санс и Сан Антонио Спарс се борат за осмата позиција која обезбедува пласман во плејофот и дуел против лидерот Лос Анџелес Лејкерс. Второпласираниот Лос Анџелес Клиперс ќе игра против седмопласираниот Далас Маверикс, третопласираниот Денвер Нагетс игра против шестопласираната екипа на Јута Џез, додека четвртопласираната Оклахома Сити Тандер во првото коло на НБА-плејофот ќе игра против Хјустон Рокетс.

Вечерва се играат седум натпревари од стандардниот тек на НБА-првенството.