Јапонија усвои закон со кој се дозволува итно пукање по опасни животни од страна на ловци

ИСТАНБУЛ (АА) - Јапонија усвои закон кој овозможува итно пукање по опасни животни од страна на ловци, доколку се појават во населени места, јавуваат локалните медиуми, пренесува Анадолу.

Според информациите на „Кјодо Њуз“, измената на законот, која се очекува да стапи во сила наесен — кога мечките стануваат поактивни — е донесена поради сѐ почестите напади од мечки низ земјата.

Со новиот закон, кафеавите мечки, азиските црни мечки и дивите свињи се класифицирани како опасни животни.

Според измените, локалните власти ќе можат да повикаат ловци или надлежни лица да ги отстрелаат мечките доколку тие се најдат во населено место или доколку е неопходно да се заштити човечки живот.

Законот исто така им дава овластување на градоначалниците да ограничат сообраќај и да издадат наредби за евакуација заради безбедноста на граѓаните при вакви ситуации.

Во текот на фискалната 2023 година, заклучно со март 2024, во Јапонија е регистриран рекорден број од 219 жртви на напади од мечки, од кои шест лица го загубиле животот, соопшти Министерството за животна средина.