Јапонија одобри рекорден буџет за одбрана од 58 милијарди долари за фискалната 2026 година, поради тензиите со Кина

АНКАРА (AA) – Кабинетот на Јапонија одобри рекорден нацрт-буџет за одбрана од 9,04 трилиони јени (58 милијарди долари) за фискалната 2026 година, во услови на зголемени тензии со Кина, објавија денес локалните медиуми, јавува Анадолу.

Фискалната 2026 година претставува четврта година од петгодишниот план на Јапонија за зајакнување на одбраната, вреден 43 трилиони јени (275 милијарди долари).

Нацрт-буџетот за фискалната година што започнува во април, кој ги вклучува и трошоците поврзани со сместувањето на американските воени бази, го надминува досегашниот рекорд од 8,7 трилиони јени (55,7 милијарди долари) доделени за тековната фискална година што завршува во март 2026 година, јави новинската агенција „Кјодо“.

Фискалната 2026 година претставува четврта година од петгодишниот план на Јапонија за зајакнување на одбраната, вреден 43 трилиони јени (275 милијарди долари).

Во рамките на планот, 100,1 милијарда јени (641 милион долари) се наменети за развој на слоевитиот крајбрежен одбранбен систем „Шилд“, кој вклучува воздушни, површински и подводни возила.

Јапонија, исто така, ги зголемува инвестициите во технологијата за беспилотни летала, вклучително и 1,1 милијарда јени (7 милиони долари) за процена на беспилотните летала со долг дострел, со цел спречување на нарушувања на воздушниот простор.

Со цел зајакнување на своите вселенски капацитети, земјата планира да ги ребрендира Воздушните сили за самоодбрана во Воздушно-вселенски сили за самоодбрана, при што се издвојуваат дополнителни 1,1 милијарда јени за набавка на опрема за следење на мешањето во сателитските системи.

Во буџетот се предвидени и 30,1 милијарда јени (193 милиони долари) за набавка на хиперсонични наведувани ракети како дел од капацитетите за контранапад.

Претходно, Кабинетот на премиерката Санае Такаичи го одобри и почетниот нацрт-државен буџет од вкупно 122,3 трилиони јени (783 милијарди долари) за фискалната година што започнува следниот април, што претставува најголем буџет во историјата на земјата.

Зајакнувањето на јапонската одбрана доаѓа во период на зголемени тензии со Кина, кои ескалираа на 7 ноември, кога Такаичи изјави дека евентуален кинески напад врз Тајван би можел правно да се смета за „ситуација што го загрозува опстанокот“ на Јапонија, што би ѝ овозможило на земјата да го искористи правото на колективна самоодбрана.

Нејзините изјави предизвикаа остри реакции од Пекинг, при што Кина советуваше да не се патува во Јапонија и повторно воведе забрана за увоз на морски плодови, меѓу другите рестриктивни мерки.