Riyaz Khaliq Khaliq
30 Октомври 2024•Ажурирај: 31 Октомври 2024
ИСТАНБУЛ (АА) - Јапонија изрази „голема загриженост“ поради потегот на Израел да ја забрани активноста на Агенцијата на ОН за палестински бегалци (УНРВА), јавува Анадолу.
„Исклучително е важно одржливо да се обезбеди овозможувачка средина за активности за хуманитарна помош од страна на УНРВА и други меѓународни организации, а Јапонија силно ја повикува Владата на Израел да ја одржува таквата средина на одржлив начин“, се вели во соопштението на Министерството за надворешни работи вчера.
Во соопштението исто така е изразена „длабока загриженост“ за натамошното влошување на хуманитарната ситуација која „веќе е страшна поради долготрајните борби во Појасот Газа, како и натамошното влошување на хуманитарните услови во областите вклучувајќи го Западниот Брег и Либан“.
Министерството рече дека обезбедувањето „неутралност“ е од клучно значење за Агенцијата на ОН бидејќи работи во предизвикувачко опкружување.
УНРВА игра „незаменлива улога во обезбедувањето хуманитарна помош, како и здравствена заштита и образование за милиони палестински бегалци не само во Појасот Газа, туку и низ целиот регион на Блискиот Исток“, соопшти Министерството.
Од 1953 година, Јапонија финансиски придонесува за УНРВА и тесно соработува со Агенцијата за да им помогне на палестинските бегалци, се додава.
Израелскиот Кнесет, односно Парламент, во понеделникот усвои закони со кои ѝ се забранува на НРВА да врши каква било активност или да обезбедува каква било услуга во Израел, вклучувајќи ги областите на окупираниот Источен Ерусалим, Газа и Западниот Брег.
Законот ќе стапи на сила за 90 дена.
- Агенцијата има мандат да им помага и да ги заштити палестинските бегалци
Израел ги обвини вработените во УНРВА за соучесништво во прекуграничниот упад на палестинската група Хамас на 7 октомври 2023 година, тврдејќи дека образовните програми на Агенцијата „промовираат тероризам и омраза“.
УНРВА, со седиште во населбата Шеик Џара во источен Ерусалим, ги негира обвинувањата и тврди дека останува неутрална, фокусирајќи се само на поддршката на бегалците.
Агенцијата е основана со резолуција на Генералното собрание на ОН во 1949 година со мандат да обезбеди помош и заштита на палестинските бегалци.
Израелската Армија ја продолжи разорната офанзива на Појасот Газа по прекуграничниот упад на Хамас минатиот октомври, и покрај резолуцијата на Советот за безбедност на ОН со која се бара итен прекин на огнот.
Според локалните здравствени власти, оттогаш во израелските напади се убиени повеќе од 43.060 Палестинци, главно жени и деца, а над 101.200 се повредени.
Израелските напади го раселија речиси целото население на територијата поради тековната блокада што доведе до сериозен недостиг на храна, чиста вода и лекови.
Израел е обвинет за геноцид пред Меѓународниот суд на правдата за неговите постапки во Газа.
