МОСКВА (АА) – Сирискиот министер за надворешни работи Асад ал-Шаибани денес истакна дека две клучни достигнувања за Сирија во изминатата година се завршувањето на долготрајниот конфликт и последователното укинување на меѓународните санкции, јавува Анадолу.

Говорејќи на средбата со рускиот министер за надворешни работи Сергеј Лавров, во Москва, Ал-Шаибани нагласи дека односите меѓу Русија и Сирија влегуваат во напредна фаза на развој.

„Изминатата година беше значајна за Сирија. Пред сè, таа го означи крајот на војната што траеше 14 години и крајот на претходниот режим. Најважниот успех што го постигнавме во текот на оваа година е укинувањето на санкциите за Сирија“, изјави Ал-Шаибани.

Тој истакна дека актуелниот фокус на преодната Влада е насочен кон обнова на земјата по конфликтот и воспоставување дипломатска рамнотежа во меѓународните односи.

„Околу четвртина милион станбени куќи и 4 милиони станбени објекти се уништени во Сирија“, рече тој.

Ал-Шаибани додаде дека и понатаму има голем број раселени лица што живеат во шаторски населби во северните и североисточните делови на земјата, при што многумина изразуваат желба да се вратат во своите домови штом ќе се создадат соодветни услови за живот.

Според неговите зборови, речиси 250.000 лица сè уште се водат како исчезнати, што тој им го припиша на постапките на поранешните власти.

„Справувањето со овие предизвици претставува апсолутен приоритет во почетната фаза од преодниот период на Сирија“, истакна Ал-Шаибани.

Тој додаде дека изминатата година биле преземени мерки за запирање на ширењето на дрогата и дека Владата сега се обидува да привлече инвестиции во сириската економија, со цел отворање нови работни места што, како што рече, е една од темите на билатералната соработка со Русија.

Рускиот министер за надворешни работи Сергеј Лавров го поздрави Ал-Шаибани, кој вчера се сретна со рускиот претседател Владимир Путин, нагласувајќи ја важноста од одржување континуиран дијалог меѓу двете земји.

„Знам дека вчера имавте многу добра средба со рускиот претседател Владимир Путин, на која беа разгледани билатералните прашања, состојбата во регионот и практичните задачи за обезбедување на клучното прашање – суверенитетот и територијалниот интегритет на Сириската Арапска Република“, рече Лавров.

Тој го покани Ал-Шаибани денешната средба да ја искористи за разгледување можности за унапредување на соработката на повеќе полиња.