ЛОНДОН (АА) - Италијанскиот регулатор за пазарна конкуренција (АГЦМ) ѝ изрече висока казна од 256 милиони евра (302 милиони долари) на нискобуџетната авиокомпанија „Рајанер“ за наводно спроведување „злоупотребувачка стратегија“ за блокирање на пристапот на туристичките агенции до нејзините услуги, се вели во соопштението објавено вчера, јавува Анадолу.

АГЦМ соопшти дека „Рајанер“ го усложнила процесот за туристичките агенции да купуваат авионски билети преку нејзината интернет-страница, практика што, според наодите, била забележана од април 2023 година, па најмалку до април оваа година.

Казната е изречена за компанијата „Рајанер ДАЦ“, како и за нејзината матична компанија „Рајанер Холдингс ПЛЦ“.

„По сложена истрага, Управата утврди дека ‘Рајанер’ воспоставила сложена стратегија што влијае на способноста на онлајн и традиционалните туристички агенции да купуваат билети за летови на ryanair.com“, се наведува во соопштението на АГЦМ.

Се додава дека стратегијата, особено во комбинација со летови на други авиопревозници и со дополнителни туристички и осигурителни услуги, „ги блокирала, попречувала или ги правела овие купувања потешки и/или економски или технички оптоварувачки“.

„Оттука, управата заклучи дека, барем до интеграцијата на АПИ-системите, однесувањето на ‘Рајанер’ можело и фактички го попречувало работењето на туристичките агенции и ја намалувало способноста на онлајн агенциите да привлечат интернет-посети“, се наведува понатаму.

Во реакцијата „Рајанер“ соопшти дека веднаш ќе поднесе жалба против, како што ја нарече, „правно погрешната“ одлука и изречената казна.

„‘Рајанер’, најголема авиокомпанија во Европа, денес (вторник, 23 декември) ги задолжи своите адвокати веднаш да поднесат жалба против бизарната и правно неоснована одлука и казната од 256 милиони евра, неправедно изречена од АГЦМ“, соопшти ирскиот авиопревозник.

Компанијата потсети дека одлуката, според нив, го игнорира и поништува преседанот од јануари 2024 година на Судот во Милано, со кој директниот модел на дистрибуција на „Рајанер“ бил оценет како модел што „несомнено им користи на потрошувачите“ и овозможува „конкурентни цени“.

„Неоснованите обиди на АГЦМ да редефинира одреден временски период по одлуката на Судот во Милано и погрешно да тврди дека ‘Рајанер’ има доминантна позиција во воздушниот сообраќај од и кон Италија ќе бидат поништени“, соопшти компанијата.

„Оваа одлука и казна се правно неосновани и ќе бидат укинати во жалбената постапка“, се додава во соопштението.