Циклонот Гаранс одзеде три животи во француската прекуморска територија Реунион

НАИРОБИ (АА) - Циклонот Гаранс денес го зафати островот Реунион, француска прекуморска територија во Индискиот Океан, ги однесе животите на најмалку три лица и предизвика оштетување на инфраструктурата, јавува Анадолу.

Челникот на департманот на островот Реунион, Патрис Латрон, ги потврди трите жртви и додаде дека 182.000 луѓе останале без струја, 171.000 немаат чиста вода за пиење, а 134.000 немаат интернет. Тој рече дека црвеното предупредување ќе биде на сила до утре (сабота).

Францускиот премиер Франсоа Бајру, исто така, го потврди бројот на загинати на неговиот профил на Х, велејќи дека циклонот сè уште претставува закана за островот. „Повикувам да се почитуваат упатствата на локалните власти. Благодарност до државните служби кои ни помагаат да го поминеме ова искушение“, рече тој.

Интензивните ветрови од циклонот и обилните врнежи предизвикаа големи прекини на електричната енергија, прекини во водоснабдувањето и голема материјална штета низ островот.

Според властите, бурата удрила на копното со максимални постојани ветрови од над 200 километри на час откорнувајќи дрвја, покриви и предизвикувајќи сериозни поплави во различни региони.

Циклонот ги принуди властите да издадат предупредување за жителите да се задржат во нивните домови и за прекинување на сите несуштински активности.

Службите за итни случаи се мобилизирани за да ја проценат штетата, да ги обноват основните услуги и да им пружат помош на погодените.