ЦИА водела тајна програма за саботажа на посевите на опиум во Авганистан

ВАШИНГТОН (АА) — Американската Централна разузнавачка агенција (ЦИА) тајно спровела операција која траела една деценија за ослабување на производството на опиум во Авганистан со расфрлање модифицирани семки од афион низ полињата во земјата, пренесува Анадолу.

„Вашингтон пост“ денес објави дека тајната програма, спроведена во периодот помеѓу 2004 и 2015 година, имала за цел да ја деградира јачината на авганистанската култура на опиум од милијарди долари - клучен извор на приход за талибанците и другите групи.

Цитирајќи 14 лица запознаени со доверливите досиеја, во веста се вели дека ЦИА фрлала специјално развиени семки од афион кои произвеле растенија што не содржат речиси никакви хемикалии што се користат за производство на хероин.

Фрлањето од воздух, првично со користење на британски авиони Ц-130, наводно се спровело во авганистанските покраини Нангархар и Хелманд.

Проектот, воден од Центарот за криминал и наркотици на ЦИА, бил овластен од тогашниот претседател Џорџ В. Буш и продолжил и во администрацијата на Обама, објави весникот.

Иако ЦИА не одговори веднаш на наводите, поранешни претставници изјавија за весникот дека програмата е „исклучително скапа“ и дека нејзините резултати се мешани.