Хамас бара цврст меѓународен став за израелските масакри врз новинарите во Газа

ГАЗА (АА) - Хамас ја повика меѓународната заедница да преземе решителна акција против израелското таргетирање новинари во Газа, откако уште пет дописници беа убиени денес во енклавата, пренесува Анадолу.

Во соопштението, Хамас го осуди масакрот извршен од израелските сили, обвинувајќи ги за непочитување на меѓународните закони кои ги штитат новинарите и им овозможуваат да работат во зоните на конфликти.

Хамас, исто така, ги повика новинарите, медиумските професионалци и меѓународните медиумски организации да ги поддржат палестинските новинари, да им ја пружат сета потребна помош и да ги разоткријат постапките на Израел.

Претходно во текот на денот, канцеларијата за медиуми во Газа соопшти дека пет палестински новинари се убиени низ Појасот Газа во изминатите неколку часа, со што бројот на загинати новинари од октомври минатата година достигна 158.

Израел започна со напади врз Појасот Газа по прекуграничниот напад на Хамас на 7 октомври 2023 година во кој загинаа околу 1.200 луѓе.

Покрај тоа што оттогаш Израел уби повеќе од 38.000 Палестинци, воената кампања претвори голем дел од енклавата во која живеат 2,3 милиони луѓе во урнатини, оставајќи ги повеќето цивили без покрив над главата и во опасност од глад.

Новинарите во Газа се соочуваат со особено висок ризик додека се обидуваат да известуваат за конфликтот за време на израелските воздушни и копнени напади, прекинатите комуникации, недостигот на храна и други средства и големите прекини на електричната енергија.