Франција усвои закон со кој се продолжува периодот на притвор на „опасни“ странски државјани на 210 дена

ИСТАНБУЛ (АА) - Францускиот Парламент одобри нов закон со кој се продолжува максималниот период на административен притвор за странските државјани кои се сметаат за „опасни“ и чекаат депортација од 90 на 210 дена, јавува Анадолу.

Законот беше усвоен вчера на конечно гласање во Сенатот, горниот дом на Парламентот, со 228 гласа „за“ и 108 „против“, објави францускиот радиодифузер БФМТВ.

Тој веќе беше одобрен од Националното собрание, што значи дека сега ги надмина сите законски пречки.

Претходно, странските државјани во постапка за депортација можеа да бидат задржани во административни притворни центри максимум 90 дена. Новоусвоениот закон го продолжува овој период на 210 дена за оние кои се сметаат за опасни, усогласувајќи го со веќе постоечкото ограничување за лица осудени за тероризам.

Францускиот министер за внатрешни работи Бруно Ретајо на социјалната мрежа Х го поздрави усвојувањето на законот, нарекувајќи го „голем чекор напред“.

Мерката е дел од пошироките напори на француската Влада за заострување на контролата врз имиграцијата и зголемување на ефикасноста на депортациите, особено оние што вклучуваат лица што се сметаат за безбедносна закана.