Франција: Нуклеарното одвраќање сочинува 13% од одбранбениот буџет

ИСТАНБУЛ (АА) - Француското нуклеарно одвраќање во моментов изнесува 13% од вкупниот одбранбен буџет, а тој удел ќе се зголеми со плановите на Париз за проширување на нуклеарниот арсенал, изјави денес министерката за вооружените сили на Франција, Катрин Вотрен, јавува Анадолу.

Вотрен во интервјуто за радиото Франс ентер посочи дека се очекува трошоците за нуклеарно одвраќање да достигнат 57,1 милијарда евра (61,7 милијарди долари) во 2026 година.

Нејзините изјави следуваат еден ден откако претседателот Емануел Макрон најави зголемување на бројот на нуклеарни боеви глави во рамките на новата доктрина за „напредно нуклеарно одвраќање“, со цел адаптирање на, како што рече, влошената и сè покомплексна безбедносна средина.

Вотрен нагласи дека и покрај зголемениот интерес од неколку европски земји за францускиот нуклеарен чадор, одвраќањето ќе остане целосно финансирано и контролирано од Париз.

„Она што мора да се има предвид е дека овој суверенитет, од почетокот до крајот, не се менува, тој останува француска одлука, целосно финансирана од Франција. Тоа е основата на нашата доктрина“, изјави таа.

Министерката додаде дека француската нуклеарна позиција не е нова во пошироката стратегиска перспектива, потсетувајќи дека уште во 1972 година официјалните одбранбени документи наведувале дека виталните интереси на земјата се протегаат и надвор од нејзините граници.

Трошоците за зголемувањето на бројот на боеви глави, сегашниот арсенал е околу 290, ќе бидат покриени преку дополнителни средства во рамките на претстојната измена на Законот за воено програмирање за периодот oд 2024 до 2030 година. Владата планира да додаде 36 милијарди евра на претходно одобрениот одбранбен пакет од 413 милијарди евра.

Одлуката доаѓа во време на зголемени тензии на Блискиот Исток по тековните американско-израелски напади врз Иран, во кои, според извештаите, убиени се повеќе високи ирански функционери.

Како одговор на тоа, Техеран изврши напади со беспилотни летала и ракети врз цели во Израел, како и врз неколку земји од Заливот каде што се наоѓаат американски бази.