ШАРМ ЕЛ ШЕИК/АНКАРА (АА) - Турскиот претседател Реџеп Таип Ердоган денес пристигна во Египет за да присуствува на планираниот мировен самит во градот Шарм ел Шеик на Црвеното Море, јавува Анадолу.

Претседателот на аеродромот беше пречекан од министерот за култура на Египет, Ахмед Фуад Хано, министерот за млади и спорт, Ашраф Соби, амбасадорот на Турција во Каиро, Салих Мутлу Сен, и вработените во Амбасадата.

Ердоган е придружуван од министерот за надворешни работи Хакан Фидан, директорот на Националната агенција за разузнавање (МИТ) на Турција, Ибрахим Калин, директорот за комуникации на Турција, Бурханетин Дуран, и главниот советник на претседателот за надворешна политика и безбедност Акиф Чагатај Килич.

Ердоган, кој пристигна во Шарм ел Шеик на покана на египетскиот претседател Абдел Фатах ел-Сиси и американскиот претседател Доналд Трамп, ќе присуствува на Мировниот самит во Шарм ел Шеик, состанок на кој ќе се разговара за постигнатиот договор за прекин на огнот во Газа.

Се очекува турскиот претседател да присуствува на церемонијата за потпишување на Договорот од Шарм ел Шеик и да одржи консултации со лидерите од земјите учеснички за време на самитот.

Се очекува повеќе од 20 светски лидери да присуствуваат на самитот во Шарм ел Шеик, на кој ќе копретседаваат египетскиот претседател Абдел Фатах ал-Сиси и неговиот американски колега, Доналд Трамп.

Египет соопшти дека самитот има за цел „да стави крај на војната во Појасот Газа, да ги зајакне напорите за воспоставување мир и стабилност на Блискиот Исток и да воведе нова фаза на регионалната безбедност и стабилност“.

Првата фаза од договорот за прекин на огнот во Газа стапи на сила во петокот, според планот на Трамп за ставање крај на двегодишната израелска војна во енклавата.

Од октомври 2023 година, во израелските напади се убиени повеќе од 67.800 Палестинци во Газа, повеќето од нив жени и деца, оставајќи ја енклавата во голема мера непогодна за живеење.