ИСТАНБУЛ (АА) - Рускиот министер за надворешни работи Сергеј Лавров денес изрази поддршка за самитот за Газа во Шарм ел Шеик во Египет, велејќи дека Москва очекува сите договори постигнати на состанокот да бидат спроведени и ги повика сите страни да обезбедат итен прекин на огнот, јавува Анадолу.

„Искрено посакуваме успех на денешниот самит во Шарм ел Шеик, каде што учествуваат повеќе од 20 земји од арапскиот свет и неколку западни држави“, изјави Лавров за новинарите од арапските земји во Москва.

Тој рече дека Русија се надева дека договорите ќе бидат спроведени, истакнувајќи дека „и Хамас и Тел Авив“ дале изјави во кои сугерираат дека кризата би можела повторно да се разгори.

„Верувам дека е клучно оние што го иницираа овој форум - пред сè претседателот Трамп, со поддршка на египетскиот претседател, како и раководството на Катар и Турција - да се фокусираат на потребата од итен прекин на огнот, почитување на договореното повлекување на израелските трупи од Газа, воспоставување хуманитарна помош и обнова на ова прекрасно место на Земјата“, рече Лавров.

Високиот дипломат додаде дека Русија нема да одбие учество во процесот доколку тоа го побараат учесниците на самитот, но „нема да се наметне“.

Американскиот претседател Доналд Трамп денес изјави дека израелската војна во Појасот Газа е официјално завршена, кратко откако Хамас го заврши ослободувањето на сите 20 живи израелски заложници според договорот за прекин на огнот од 20 точки.

Договорот, кој вклучува и ослободување на 1.968 палестински затвореници, беше постигнат со посредство на Египет, Катар и Турција.