ЖЕНЕВА (АА) - На една од шест бактериски инфекции што предизвикуваат болести кај луѓето низ светот во 2023 година не делува антибиотски третман, предупреди Светската здравствена организација (СЗО) денес во нов извештај што ја истакнува растечката глобална здравствена загриженост, јавува Анадолу.

Според извештајот, во периодот помеѓу 2018 и 2023 година, резистентноста на антибиотици се зголемила кај повеќе од 40 % од комбинациите патоген - антибиотик следени од СЗО, со годишен пораст помеѓу 5 % и 15 %.

Податоците доставени од над 100 земји до Глобалниот систем за надзор на антимикробната отпорност и употреба на СЗО укажуваат на растечка резистентност на клучните антибиотици што се користат за лекување на уринарни, гастроинтестинални инфекции и инфекции на крвта, како и гонореја.

„Антимикробната резистенција го надминува напредокот во модерната медицина, загрозувајќи го здравјето на семејствата низ светот“, рече генералниот директор на СЗО, Тедрос Аданом Гебрејесус.

Извештајот покажа дека резистентноста на антибиотици е највисока во регионите на СЗО во Југоисточна Азија и Источниот Медитеран, каде што на една од три пријавени инфекции постоела резистентност на антибиотици.

Ешерихија коли и клебсиела, кои се резистентни на лекови, претставуваат најголем ризик, при што повеќе од половина од глобалните случаи сега се отпорни на третмани од прва линија.

СЗО ги повика земјите да ги зајакнат лабораториските системи и да споделуваат висококвалитетни податоци за антимикробна резистенција до 2030 година.