Necva Taştan Sevinç
11 Август 2025•Ажурирај: 13 Август 2025
ИСТАНБУЛ (АА) - Истражувачите од шведскиот Институт Каролинска тврдат дека е постигната потенцијална пресвртница во борбата против бактериите отпорни на антибиотици, објавија денес локалните медиуми, пренесува Анадолу.
Во новообјавената студија, тимот покажува дека комбинирањето на антибиотици со ензим наречен ендолизин успешно ги елиминира инфекциите предизвикани од пневмококни бактерии отпорни на пеницилин кај глувци, објави шведскиот радиодифузер СВТ.
Животните со развиен менингитис целосно закрепнале без да покажат симптоми.
„Животните што ја примија терапијата преживеаја без никакви симптоми – тоа беше апсолутно фантастично“, рече Федерико Јовино, вонреден професор по медицинска микробиологија на Институтот Каролинска.
Бактериите отпорни на постојните антибиотици стануваат сè почести во Шведска и во светот, што го отежнува лекувањето на болести, како што се пневмонијата и менингитисот.
„За 20-30 години ова би можело да биде водечка причина за смрт на глобално ниво - повеќе од ракот“, предупреди Јовино.
Студијата откри дека ендолизинот, кој потекнува од бактериофаги - вируси што убиваат бактерии - им овозможил на антибиотиците повторно да дејствуваат против отпорните соеви.
Истражувачите, исто така, открија дека ензимот стигнал до мозокот за неколку часа кај глувците, што ги зголеми надежите за идно лекување на бактериски менингитис кај луѓето.
„На пациентите им е потребно ефикасно лекување во рок од максимум два дена, во спротивно, може да се појават тешки невролошки компликации, па дури и смрт“, објасни Јовино.
Следната фаза од истражувањето ќе го испита влијанието на ендолизинот врз разни други видови отпорни бактерии.
