Asiye Latife Yılmaz
11 Август 2025•Ажурирај: 11 Август 2025
ИСТАНБУЛ (АА) – „Понекогаш фотографиите на фоторепортерите се единствен доказ за неправдата и страдањето,“ вели добитникот на наградата во категоријата Секојдневен живот на İstanbul Photo Awards, јавува Анадолу.
İstanbul Photo Awards, организиран од Анадолу по 11. пат, годинава награди 29 фотографи во 10 категории. Од приближно 22.000 пратени фотографии од целиот свет, беа избрани најдобрите – доказ за угледот на натпреварот што од своето основање привлече повеќе од 20.000 фотографи на глобално ниво.
Палестинскиот фотограф Махмуд Заки Салем Иса ја освои првата награда за Единечна фотографија од секојдневниот живот во чест на Марион Мертенс, на која е прикажана кризата со гладот во Газа.
„Оваа фотографија прикажува болна човечка сцена – луѓе што страдаат од глад и сиромаштија, брзајќи да најдат храна“, изјави Иса за Анадолу.
Неговата фотографија, насловена „Хуманитарна криза: Глад и блокада“, ја документира паниката и очајот на лицата на луѓето што со празни садови се обидуваат да обезбедат дневна прехрана.
Северна Газа беше погодена од разорен глад за време на долготрајната опсада. Недостигот на храна, уништената инфраструктура и блокираните патишта за помош доведоа до невидена хуманитарна катастрофа.
Болката во Газа го поттикнала Иса да ги фотографира местата за бесплатно делење храна и да ја забележи мачната состојба на децата, од кои многумина неисхранети.
„Моите чувства беа мешавина од тага и беспомошност, но и желба да пратам порака до светот за оваа трагедија“, изјави тој, нагласувајќи дека ситуацијата го погодила и лично бидејќи и неговото семејство минувало низ исто страдање.
Еден од најтешките моменти бил тоа што морал да пешачи долги растојанија за да стигне до пунктовите за храна и да ја документира состојбата бидејќи транспортот бил целосно парализиран.
- Фотоапаратот како сведок -
„Чувствував дека оваа фотографија е најблиску до реалното прикажување на страдањето – луѓето што брзаат по храна и децата што плачат за да добијат нешто за јадење“, рече Иса.
За него, новинската фотографија не е само сведоштво, туку и одговорност: „Тоа е моќна алатка што може да влијае врз јавното мислење, да поттикне промени и да ја открие вистината.“
Тој верува дека фотографијата има сила да промени нешто: „Како што една фотографија може да има длабоко влијание, така и многу слики од Газа низ годините имаа глобален одек.“
Иса истакна дека современата технологија им овозможува на фоторепортерите во конфликтни зони да објавуваат вести речиси моментно и да снимаат појасни слики дури и во најтешки услови.
Добивањето на наградата за него било мешавина од радост и тага – радост за признанието, но и болка поради постојаното бомбардирање, опсадата, гладот и уништувањето во Газа.
„Се надевам дека оваа фотографија ќе биде причина да се запре војната против народот на Газа“, истакна Иса.
İstanbul Photo Awards на Анадолу прераснаа во значаен светски настан во фотоновинарството, одбележувајќи ја уметноста на визуелното раскажување, истовремено осветлувајќи клучни глобални прашања.
Натпреварот е поддржан од Турксел како комуникациски спонзор, Турската агенција за соработка и координација (ТИКА) како спонзор за меѓународни настани и „Туркиш ерлајнс“ како авиопревозник - официјален спонзор.
