БЕРЛИН

Тројца скијачи загинаа, а двајца се повредени во лавина во централна Австрија, соопштија австриските власти, пренесува Агенција Анадолија (АА).

Жртвите биле дел од група од 11 скијачи. Осуммина биле погодени од лавината додека се искачувале на падина во текот на скијачка тура во саботата во областа Твенг во Салцбург.

„Тројца од скијачите биле затрупани од лавината, додека уште двајца биле делумно затрупани, но успеале да се ослободат“, се вели во соопштението на регионалната полиција.

Спасителите успеале да лоцираат двајца од затрупаните скијачи со помош на уредот за претрага.

Едниот од нив веќе бил мртов, а вториот починал подоцна во болница во Клагенфурт.

Третиот затрупан скијач не носел уред за претрага. Тој бил пронајден неколку часа по лавината.

Загинатите се Австријци, двајца на возраст од 19 години и еден на возраст од 24 години. Двајцата повредени скијачи се префрлени во локалната болница.