Телевизискиот канал што ќе го основаат Турција, Малезија и Пакистан, ќе биде во стилот на „Би-би-си“

ИСЛАМАБАД (АА) - Премиерот на Пакистан, Имран Кан, истакна дека телевизискиот канал што ќе го основаат Турција, Малезија и Пакистан, ќе биде сличен на британската телевизија „Би-би-си“ (BBC), пренесува Anadolu Agency (AA).

Кан на својот профил на социјалните мрежи, споделувајќи фотографија со турскиот претседател Реџеп Таип Ердоган и премиерот на Малезија, Махатир Мухамед, даде информации за телевизискиот канал за кој се договорија лидерите.

Тој, истакнувајќи дека телевизискиот канал ќе обработува теми за прашањата кои се однесуваат на муслиманите, рече: „На нашите средби одлучивме дека покрај прашањата за муслиманите, ќе се подготвуваат и емисии за борбата против исламофобијата. Каналот ќе биде на англиски јазик од типот на Би-би-си.“

Кан, минатата недела, по средбата на тројцата лидери во рамките на седницата на Генералното собрание на Обединетите нации, истакна дека се договориле за основање на заеднички телевизиски канал.

Премиерот Кан исто така рече дека каналот што треба да се основа ќе има за цел да ги коригира погрешните информации во врска со исламот и да се бори против исламофобијата.