Судири за време на протестите: 380.000 луѓе на улиците низ Франција

ПАРИЗ (АА) - Насилство избувна за време на масовните протести низ Франција вчера против владината реформа на пензискиот систем, јавува Анадолу.

Околу 380.000 луѓе излегоа на улиците низ Франција, од кои 42.000 во Париз, покажуваат податоците на Министерството за внатрешни работи.

Генералната конфедерација на трудот соопшти дека повеќе од еден милион луѓе биле на улиците низ француските градови.

Во многу француски градови се одржуваат протести, а вработените во секторите, како образование, транспорт и енергетика, штрајкуваат против реформата, која стана главна тема на разговор на политичката сцена во земјата.

Насилните групи се инфилтрираа на собирот, како и за време на претходните протести. Вандализираат излози и создаваат немири на улиците. Дојде до судири помеѓу тие групи и полицајците, во кои еден маж е повреден.

Полицијата се судри со групите, употребувајќи солзавец и водени топови, додека другата страна фрлаше проектили кон нив. Меѓутоа, фрлен е солзавец и на мирните демонстранти.

Најмалку десет полицајци се повредени во Париз, од кои еден потешко, пишува францускиот дневен весник „Фигаро“.

Контроверзната владина реформа на пензискиот систем вклучува зголемување на старосната граница за пензионирање од 62 на 64 години.

Од 16 март се одржуваат протести низ Франција, а во повеќе градови има немири и судири помеѓу демонстрантите и полицијата. Повеќе од илјада демонстранти беа приведени.