ИСТАНБУЛ (АА) - Сириското Претседателство го претстави новиот национален симбол на земјата синоќа на церемонијата во претседателската палата во Дамаск, придружена со национално одбележување на плоштадите во поголемите градови, јавува Анадолу.

Претставувањето на новиот симбол доаѓа во период кога земјата преминува од повеќедецениското владеење на партијата Баас во нова политичка фаза.

Претседателот Ахмед ал-Шара за новиот симбол рече дека е одраз на „обединета, неделива Сирија“, јави државната Сириска арапска новинска агенција (САНА).

„Идентитетот што го лансираме денес ја одразува новата историска фаза на Сирија“, рече Ал-Шара на настанот. „Тој црпи инспирација од златниот орел - симболизирајќи ги силата, решителноста, брзината, прецизноста и иновацијата.“

Златниот орел го заменува претходниот симбол на јастреб и е на врвот од три ѕвезди што го претставуваат ослободувањето на народот, како што е опишано од Министерството за информации.

Петте пердуви на опашката ги симболизираат главните географски региони на Сирија - север, исток, запад, југ и централниот регион - а неговите 14 пердуви на крилата претставуваат 14 покраини на земјата, за кои се вели дека раскажуваат „приказна за издржливоста и отпорот во текот на 14 години револуција“.

Усвојувањето на новиот идентитет ќе биде проследено со практични промени, меѓу кои и замена на националните лични карти и пасоши за да се усогласат со новиот дизајн.

Во говорот што ја спои симболиката со политичките пораки, Ал-Шара се осврна на античката историја на Дамаск.

„Одамна една приказна започна во градот каде што се вели дека тука живееле првите луѓе. Тие се множеле, а со нивниот растечки број се појавила и потребата за градење дисциплинирано однесување. Тие саделе, создавале и граделе сè додека не му го дале на светот својот прв главен град - Дамаск.“

„Кој и да ја разгледува историјата, ќе открие дека Дамаск е почеток и крај на светската приказна и ќе сфати дека она што го преживеавме под претходниот режим беше најпонижувачката ера во историјата на градот“, додаде тој.

Обраќајќи се до нацијата, Ал-Шара рече: „Приказната за Дамаск продолжува преку вас. Историјата ќе забележи дека вашиот пад е завршен, вашето оживување започнува, вашата крв не била пролеана залудно, вашето страдање било слушнато, вашето прогонство завршило и вашите затвори се отвориле. Трпението донесе победа.“

Тој потврди дека „новиот визуелен идентитет ја изразува обновата на сириската индивидуа и го обновува сирискиот идентитет обликуван од емиграцијата во потрага по безбедност и ветувачка иднина. Ние му ги враќаме неговата самодоверба, достоинство и природно место дома и во странство“.

Министерот за надворешни работи Асад ал-Шаибани, исто така, имаше обраќање на церемонијата, велејќи дека во последните месеци сириската дипломатија активно ја отфрлила „влошената реалност“ наследена од поранешниот режим.

„Се сретнавме со светски лидери што ветија дека ќе ги поддржат Сиријците во обновата на нивната земја. На секоја средба го пренесувавме новото лице на Сирија“, рече тој.

Тој нагласи отстапување од идеолошките слогани, со цел наместо тоа да се врати глобалната позиција на Сирија.

„Работевме на пораки што го прикажуваат вистинскиот лик на Сирија и го зачувуваат достоинството на нејзиниот народ. Нашите напори ја вратија Сирија на меѓународната сцена - не како одложена надеж, туку како сегашна реалност.“

Ал-Шаибани рече дека нацијата сега ја дефинира својата иднина според свои услови, а не преку перцепциите на другите.

„Она што ни треба денес е национален дух што ги враќа расфрланите парчиња од нашиот сириски идентитет“, рече тој, додавајќи дека прифаќањето на диверзитетот на Сирија е „почетна точка за градење на иднината“.

Тој го заврши обраќањето прогласувајќи го моментот „културна смрт“ за наследството на поранешниот режим на „угнетување и корупција маскирана со празни слогани“.

- Прослави низ цела Сирија -

Прославите што го одбележуваа претставувањето на новиот идентитет се одржаа на јавните плоштади во Дамаск и во другите големи покраини.

Во главниот град настаните се одржаа на плоштадот Умајад, Гробницата на непознатиот војник и на просторот на саемот. Други прослави се одржаа во руралните средини на Дамаск и во регионалните центри, како на плоштадот Шеик Дахер во Латакија, плоштадот Садалах ал-Џабири во Алепо и плоштадот Сабаа Бахрат во Идлиб и Деир ез-Зор. Плоштадот Аси во Хама и други места во западните губернии, исто така, беа домаќини на јавни собири.

Корисниците на мобилни телефони претходно во текот на денот добија текстуални пораки од локалните телекомуникациски оператори со кои се најави презентирањето на новиот национален симбол, опишувајќи го како „обновен симбол на решителност и еманципација на небото на слободата“.

Башар ал-Асад, лидер на Сирија речиси 25 години, избега во Русија во декември, со што се стави крај на режимот на партијата Баас, која беше на власт од 1963 година.

Во јануари во Сирија беше формирана новата преодна администрација предводена од претседателот Ахмед ал-Шара.