Турскиот авиопревозник „АЏет“ го реализираше првиот лет од Истанбул до Дамаск

ИСТАНБУЛ (АА) – Турскиот авиопревозник „АЏет“ денес успешно го реализираше првиот лет од Меѓународниот аеродром „Сабиха Ѓокчен“ во Истанбул до сирискиот главен град Дамаск, што претставува прв ваков лет по повеќе од една деценија, јавува Анадолу.

Според соопштението на авиокомпанијата, започнати се редовни дневни летови од Истанбул до Дамаск, еден од клучните центри на Блискиот Исток.

Со ова, „АЏет“ стана првата авиокомпанија што воспоставува линија на оваа рута од „Сабиха Ѓокчен“ по 13 години пауза.

По двочасовниот лет, патниците беа пречекани со свечена церемонија на Меѓународниот аеродром во Дамаск.

Извршниот директор на „АЏет“, Керем Сарп, на свеченоста истакна дека компанијата се гордее што по 13 години повторно воспоставува директни летови од Турција до Дамаск.

Тој најави дека на 4 јули (петок), ќе се реализира и првиот директен лет од турската престолнина Анкара до Дамаск, што ќе ја направи „АЏет“ првиот превозник што воспоставува ваква линија од Анкара по многу години.

„Отсега па натаму, АЏет ќе врши дневни летови од Истанбул и три лета неделно од Анкара до Меѓународниот аеродром во Дамаск“, истакна тој.

Тој нагласи дека со новата ера во Сирија, развојот на настаните кон мир и стабилност во регионот повторно ја истакнува важноста на новата рута, додавајќи дека директните летови до Дамаск, еден од античките градови на Блискиот Исток, ќе помогнат во оживувањето на човечките и трговските врски, а исто така ќе го промовираат братството за време на процесот на закрепнување на Сирија.

„АЏет“ моментално оперира кон 59 дестинации во 34 земји, а со вклучувањето на Дамаск во својата мрежа, компанијата продолжува со реализација на своите цели за проширување во Европа, Блискиот Исток, Централна Азија и Северна Африка.