Сиљановска-Давкова се сретна со шпанскиот премиер Санчез, во фокус европската интеграција и економската соработка

СКОПЈЕ (АА) - Претседателката на Северна Македонија, Гордана Сиљановска-Давкова, во рамките на нејзиното учество на 4-тата Меѓународна конференција за финансирање на развојот во Севиља, Шпанија, се сретна со шпанскиот премиер Педро Санчез, пренесува Анадолу.

Осврнувајќи се на европската интеграција на Северна Македонија, Сиљановска-Давкова посочи на тешките македонски компромиси коишто треба да бидат соодветно вреднувани од Европската Унија и истакна дека влезот во ЕУ ќе биде корисен и за самата Унија, и за земјите кандидати коишто дополнително ќе ја стабилизираат, се вели во соопштение од Кабинетот на претседателката.

Таа оцени дека Шпанија е важен партнер на земјата во рамките на НАТО, ООН, ОБСЕ и изрази благодарност до владата на Санчез и Шпанија за доследната поддршка на македонските аспирации за членство во Европската Унија.

Реафирмирајќи ја посветеноста на државата кон евроинтегративниот пат, Сиљановска-Давкова ја повтори позицијата дека билатералните прашања не треба да бидат пречка во пристапниот процес. Имајќи ги предвид турбулентните геополитички процеси во светот, таа укажа на потребата од одржување на кредибилитетот на политиката на проширување и нагласи дека регионов кој историски, географски и културно припаѓа на ЕУ, треба што поскоро да се интегрира во европското семејство.

Претседателката со задоволство ја прими информацијата од премиерот Санчез дека Шпанија е заинтересирана за зголемена економска соработка во делот на туризмот, инфраструктурата, земјоделието, енергетиката, соларната енергија и управувањето со водните ресурси, се вели во соопштението.

Двајцата соговорници разговараа за соодветно одбележување на учеството на македонските борци во Шпанската граѓанска војна.