Русија ја обвинува Велика Британија за вмешаност во нападот на Црноморската флота и гасоводите „Северен тек“

МОСКВА (АА) - Кремљ денес соопшти дека руското разузнавање има информации за вмешаноста на Лондон во нападите врз гасоводите „Северен тек 1“ и „Северен тек 2“ и врз Црноморската флота во пристаништето Севастопол, јавува Агенција Анадолија (АА).

„Нашите специјални служби... имаат докази дека раководството и координацијата на нападот на заливот Севастопол ги извршиле британски воени консултанти.“

„Постојат докази дека Британија е вмешана во саботажа... терористички чин на критичната енергетска инфраструктура, гасоводите Северен тек“, изјави портпаролот Дмитриј Песков на брифинг со новинарите во Москва.

„Москва очекува дека и покрај молкот, европските метрополи ќе ги анализираат информациите за вмешаноста на Лондон во нападот на гасоводите 'Северен тек'“, рече Песков.

„Не можеме да ги оставиме ваквите акции за џабе. Ќе размислиме за следните чекори... Ќе го направиме она што треба да го направиме“, нагласи тој.

Русија го суспендираше своето учество во договорот постигнат со посредство на Туркије и ОН за извоз на украинско жито, по, како што рече, нападите врз нејзината Црноморска флота.

Во септември имаше протекување на гасоводите „Северен тек 1“ и „Северен тек 2“, што, според истрагата, било предизвикано од серија експлозии за кои се верува дека биле „намерна саботажа“.

Гасоводите „Северен тек“ беа изградени за транспорт на природен гас од Русија до Германија преку Балтичкото Море од страна на руската државна гасна компанија „Газпром“.

Протекувањето се совпадна со отворањето на балтичкиот гасовод, кој испорачува природен гас од Северното Море преку Данска до Полска.