Русија: „Одржани разговори со Џо Бајден за нова средба со Владимир Путин“

x§МОСКВА

Рускиот министер за надворешни работи, Сергеј Лавров, денес зборуваше со американскиот претседател, Џо Бајден, во врска со потребата за уште еден состанок меѓу претседателите на САД и Русија, соопшти Кремљ, јавува Агенција Анадолија (АА).

„Лавров кратко разговараше со претседателот Бајден на самитот на Г20 во Рим и разговараа за потребата од продолжување на контактите на високо ниво меѓу Русија и САД“, изјави за новинарите во Москва портпаролот на Кремљ, Дмитри Песков.

„Контактите на највисоко ниво се неопходни за односите на Русија и САД на билатерално ниво и на 'поширока географија'“, додаде тој.

Песков рече дека Москва и Вашингтон одржале серија консултации за кибербезбедноста откако Владимир Путин и Бајден се сретнаа во Женева во јуни оваа година.

„Овие контакти се одвиваат зад затворени врати. Ова не е област каде публицитетот може да ни помогне да ги постигнеме резултатите што Москва и Вашингтон би сакале да ги постигнат. Се надеваме дека овие контакти ќе продолжат“, додаде тој.

Во врска со „разочарувањето“ на Бајден поради отсуството на Русија од разговорите за климатските промени на Г20, Песков истакна дека Русија имала многу активно учество на форумот, вклучително и „два значајни говори“ на Путин преку видеолинк.

Тој посочи дека Русија го изложила својот план и целите за јаглеродна неутралност неколку недели пред самитот на Г20.

Што се однесува до 26-тата Конференција на ОН за климатски промени, што започна вчера во Глазгов, Песков рече дека рускиот претседател нема да учествува „бидејќи не постои можност да се обрати на собирот преку видео“.

„Путин, сепак, снимил видеопорака што ќе се пушти на една од сесиите“, додаде тој.

Во врска со прашањето за признавање на вакцините меѓу Русија и ЕУ, Песков рече дека има надеж за „позитивни резултати“ во блиска иднина.

„Ова е тежок процес, иако добро се движиме по ова прашање. Се надеваме дека ќе има позитивни резултати во догледна иднина“, рече тој.