Ректори на пет израелски универзитети апелираа до Нетанјаху да стави крај на гладот во Газа

ЕРУСАЛИМ/ИСТАНБУЛ (АА) – Ректорите на пет водечки универзитети во Израел упатија апел до премиерот Бенјамин Нетанјаху да стави крај на гладот во Газа, предупредувајќи на катастрофалните последици за цивилното население, вклучително и за новороденчињата, јавува Анадолу.

Во писмо објавено од дневниот весник „Израел Хајом“ потписниците - ректорот на Институтот Вајцман, Алон Чен, ректорот на Еврејскиот универзитет, Ашер Коен, ректорот на Технион, Ури Сиван, ректорот на Универзитетот во Тел Авив, Ариел Порат и ректорот на Отворениот универзитет, Лео Кори - рекоа дека се „шокирани“ од хуманитарната состојба во палестинската енклава.

„Како и многумина Израелци, така и ние сме ужасени од сцените од Газа, вклучително и на бебињата што умираат секој ден од глад и болести“, се вели во писмото.

Ректорите на универзитетите прават притисок врз Нетанјаху да стави крај на „големиот глад што ја зафати Газа, кој зема голем данок од цивилите што не се вклучени во конфликтот, меѓу кои и деца и бебиња“.

Тие изразија загриженост поради изјавите на израелските министри и членови на Кнесетот, кои повикуваат на уништување на Газа.

„Како народ што ги преживеа ужасите на холокаустот, исто така, ние имаме одговорност да ги искористиме сите средства што ни се на располагање за да спречиме сурово и неселективно нанесување штета на невини мажи, жени и деца“, напишаа тие.

Во писмото, исто така, се критикуваат изјавите на израелските официјални претставници во кои се сугерира употреба на нуклеарно оружје, целосно ускратување на храна и протерување на Палестинците.

„Очекуваме Вие и Владата недвосмислено да ги осудите овие опасни изјави“, се вели во писмото, додавајќи дека ваквите повици претставуваат „воени злосторства и злосторства против човештвото“ според меѓународното право.

Тие дополнително ја критикуваа наводната идеја за изградба на т.н. „хуманитарен град“ во Рафа, споредувајќи ја со концентрационите логори од Втората светска војна. Оценето е дека ваков потег би ѝ нанел непоправлива штета на моралната позиција на Израел.

Меѓународните набљудувачи предупредија дека предложениот камп ќе ги затвори Палестинците и ќе ги лиши од храна за да се предизвика масовна миграција во странство.

Исто така, шефот на хуманитарната служба на ОН, Том Флечер, денес предупреди дека еден од тројца Палестинци во Газа не јадел со денови, повикувајќи на итна испорака на помош.

Локалните власти во Газа соопштија дека повеќе од 40.000 бебиња помали од една година се соочуваат со ризик од бавна смрт поради петмесечната блокада за достава на храна за новороденчиња. Беше побарано безусловно отворање на граничните премини, а Израел и неговите сојузници беа посочени како целосно одговорни за кризата.

Според податоци од Министерството за здравство во Газа, од октомври 2023 година до денес 147 Палестинци, меѓу кои 88 деца, починале од глад и неисхранетост.

Израелската армија објави дека ќе врши ограничени хуманитарни воздушни испораки и „тактички паузи“ во одредени делови на Газа за да се овозможи дистрибуција на помош. Сепак, хуманитарните организации ги оценија овие чекори како „лажно олеснување“, укажувајќи дека Израел сѐ уште го користи гладот како средство за притисок, блокирајќи го копнениот пристап на хуманитарната помош уште од март.

И покрај меѓународните повици за прекин на огнот, израелската армија води интензивна офанзива во Газа од 7 октомври 2023 година, при што се убиени речиси 60.000 Палестинци, најголем дел од нив жени и деца.

Немилосрдното бомбардирање ја уништи енклавата и доведе до недостиг на храна.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел е обвинет за геноцид во Меѓународниот суд на правдата за својата војна во енклавата.