Претставници на израелското МНР сметаат дека анексијата ќе им наштети на израелско-германските односи

ЕРУСАЛИМ (КУДС) (АА) - Израелски официјални претставници соопштија дека планот на израелската Влада за анексија на нелегалните еврејски населби на окупираниот Западен Брег и во Јорданската Долина ќе им наштети на односите меѓу Израел и Германија, пренесува Агенција Анадолија (АА).

Според веста во весникот „Хаарец“ („Haaretz“), официјални претставници на Министерството за надворешни работи на Израел, чии имиња не се објавени, ги оцениле идните односи меѓу Израел и Германија, доколку администрацијата на Тел Авив го спроведе планот за анексија.

Официјални претставници од израелското МНР велат дека анексијата ќе им наштети на односите меѓу Тел Авив и Берлин, но исто така сметаат дека Германија нема да воведе санкции кон Израел поради анексијата.

Локалниот печат пишува дека германскиот министер за надворешни работи, Хајко Мас, ќе пристигне во Израел во среда за да ја предупреди администрацијата на Тел Авив за едностраниот план за анексија на одредени области на окупираниот Западен Брег.

Наведено е дека за време на посетата, Мас ќе ја пренесе пораката дека Германија сака да го продолжи својот сојуз со Израел, но едностраната анексија ќе ја доведе администрацијата во Берлин во ситуација да избере помеѓу сојузништвото со Израел или вредностите на меѓународното право и Европската Унија.

Планот за анексија е дел од таканаречениот „Договор на векот“ на американскиот претседател Доналд Трамп, што беше објавен на 28 јануари. Според планот, Ерусалим е неделива престолнина на Израел, а се признава и израелскиот суверенитет над голем дел од Западниот Брег.

Планот предвидува формирање палестинска држава во форма на архипелаг, поврзан со мостови и тунели.

Палестинските власти велат дека според планот на САД, Израел ќе анектира 30 - 40 отсто од Западниот Брег, и целиот Источен Ерусалим.

Планот привлече големи критики од арапскиот свет и беше отфрлен од Организацијата за исламска соработка (OIC), која ги повика сите нејзини земји членки да не се вклучат на кој било начин во овој план или да соработуваат со американската администрација во неговото спроведување во која било форма.

Според договорот за коалиција, потпишан од Нетанјаху и лидерот на Сино-белата алијанса, Бени Ганц, израелскиот премиер од 1 јули ќе може да ја даде анексијата на нелегалните еврејски населби во окупираниот Западен Брег и во Јорданската Долина на одобрување во Владата или Собранието.