Почина жена, а членовите на нејзиното семејство се повредени при уривање на зграда од силна бура во Газа

ГАЗА / ИСТАНБУЛ - Почина Палестинка, а неколку членови на нејзиното семејство се повредени откако зграда се урна поради бури во Појасот Газа денес, информираа медицински лица, известува Анадолу.

Медицински персонал за Анадолу изјавија дека ѕидот на куќа што била оштетена во претходните израелски напади паднал врз шатор во населбата Ал-Римал во градот Газа. Во несреќата животот го загубила 30-годишна жена.

Обилните дождови и силните ветрови што ја погодија енклавата од синоќа поплавија и однесоа илјадници шатори на раселените лица низ Газа, информираше дописникот на Анадолу според изјавите на очевидци.

Стотици шатори на раселените лица поставени на плажата на Хан Јунис, јужно од Појасот Газа, беа исто така поплавени од зголемените морски бранови предизвикани од лошите временски услови.

Временските услови претставуваат голема опасност за раселените Палестинци кои живеат во истрошени шатори или сериозно оштетени згради со висок ризик, кои се под постојани израелски напади од октомври 2023 година.

Израелската армија уби повеќе од 71.200 луѓе, претежно жени и деца, и повреди над 171.200 од октомври 2023 година во Газа, во брутални напади што ја остави енклавата во урнатини.