ГАЗА (АА) - Хамас објави дека категорично ги отфрла сите планови на Израел насочени кон насилно раселување на Палестинците од Појасот Газа, а особено неговите обиди да го искористи регионот „Сомалиленд“ како потенцијална цел за ова раселување, известува Анадолу.

Во писмено соопштение, Хамас го нагласи своето отфрлање на меѓусебното признавање меѓу Сомалиленд и Израел.

Хамас ова признавање го опиша како опасен преседан и „неприфатлив обид за добивање лажен легитимитет на фашистички ентитет кој ги окупира палестинските територии, вклучен во воени злосторства и геноцид, и се соочува со зголемена меѓународна изолација“.

Во соопштението Хамас го повтори целосното отфрлање на плановите на Израел за насилно раселување на палестинскиот народ, особено користењето на сомалиската територија како локација за народот на Газа.

Во соопштението одлуката на израелскиот премиер Бенјамин Нетанјаху да го признае сепаратистичкиот режим во Сомалија се опишува како одраз на длабоката меѓународната изолација во која се наоѓа Израел поради неговите геноцидни злосторства.

Во соопштението на Хамас се апелира на продолжување на меѓународните напори за изолација на Израел и повикување на одговорност на неговите лидери за злосторства кон човештвото, како и јакнење на мерките за изолација на јавно и на официјално ниво.

Со зголемувањето на официјалните израелски изјави во врска со плановите за „присилно преселување“ на Палестинците од Појасот Газа, израелските медиуми исто така посочуваат дека Палестинците би можеле да бидат населени во африканските земји, вклучително и Сомалија.

Заемното признавање на сепаратистичкиот регион Сомалиленд од страна на Израел предизвика загриженост дека овој чекор е претходник на преселувањето на Палестинците од Појасот Газа во таа област.

Израел објави дека ја признава Сомалиленд, која еднострано прогласи одвојување од Сомалија, како „независна земја“, станувајќи првата земја што ја призна Сомалиленд.