ИСТАНБУЛ (AA) – Иран погуби маж осуден за шпионажа во корист на Израел откако Врховниот суд ја потврди пресудата и беше завршена севкупната законска постапка, објави денес новинската агенција Фарс, пренесува Анадолу.

Станува збор за Хамидреза Сабет Есмаилпур, кој бил приведен на 29 мај 2025 година, по акција на безбедносните сили.

Според иранските власти, тој бил обвинет за шпионажа и соработка со израелската разузнавачка служба Мосад, при што наводно пренесувал доверливи документи и информации.

Истражителите соопштија дека со анализата на неговите тајни онлајн активности било утврдено дека праќал документи до разузнавачки офицер поврзан со Израел.

Властите го обвинија и дека спроведувал разузнавачки и оперативни активности за Израел, вклучително и набавка на опрема за разузнавачки службеник, како и преместување возила низ провинциите Исфахан и Лорестан, со цел подготовка на саботажи насочени кон ракетни капацитети на Министерството за одбрана.

Иранските официјални лица го опишаа наводниот заговор како „голема операција“ што била откриена и неутрализирана од агентите на Министерството за разузнавање.

Во меѓувреме, иранските власти воведоа прекин на интернет-услугите по бранот антивладини протести што ја зафатија земјата од минатиот месец, предизвикани од наглото паѓање на вредноста на локалната валута и влошувањето на економска криза.

Протестите започнаа во Техеран, а подоцна се проширија и во други градови. Претседателот Масуд Пезешкијан го призна незадоволството на јавноста и вети дека ќе работи на подобрување на условите во земјата.