Полицијата не успеа да го уапси поранешниот премиер на Пакистан Имран Кан

КАРАЧИ (АА) - Полицијата во Пакистан денес не успеа да го уапси поранешниот премиер на земјата, Имран Кан, поради случајот поврзан со нелегалната набавка и продажба на подароци дадени од странски функционери додека бил на функцијата, пренесува Анадолу.

Судот во Исламабад во вторникот издаде налог за апсење на Кан без можност за кауција во врска со нелегалното здобивање и продажба на подароците.

„Полициски тим од Исламабад, со налог за апсење, денес стигна до североисточниот град Лахоре за да го одведе Кан во притвор“, изјави за новинарите началникот на полицијата на Исламабад, Насир Акбар.

„[Судскиот] налог му е доставен [на Кан]. Сега, ќе го информираме судот и ќе постапиме соодветно“, додаде тој.

Полицијата преку објава на Твитер соопшти дека тим заминал во Лахоре да го уапси Кан врз основа на судските налози.

„Полициски припадник влегол во резиденцијата на Кан за да ги достави судските налози, но поранешниот премиер, кој закрепнува од повредата од огнено оружје што ја доби за време на неуспешниот обид за атентат во ноември, не беше таму“, соопшти полицијата.

„Законот е еднаков за сите“, се додава во соопштението.

Сенаторот Шибли Фараз, шеф на канцеларијата на Кан, го примил судскиот налог и ја информирал полицијата дека поранешниот премиер не е дома.

На снимките што се емитуваат на повеќе локални медиуми се гледа како полицајците стојат пред главниот влез на резиденцијата на Кан во „Заман Парк“, бидејќи обезбедувањето и поддржувачите не дозволиле да влезат во резиденцијата.

Неколку стотина поддржувачи на Кан блокираа некои улици што водат кон неговата резиденција, опкружувајќи ги полициските припадници и принудувајќи ги да го напуштат местото по едночасовното конфронтирање.

Полицијата на Исламабад, во друг твит, објави дека полицискиот тим „сè уште е во Заман Парк“.

Оттаму додаваат дека се преземаат правни дејствија против оние кои го спречиле спроведувањето на судските одлуки.

Фавад Чадри, поранешен министер за информации и потпретседател на Партијата Тахрик-е-Инсаф, на прес-конференција во Лахоре, ја предупреди Владата за протести низ целата земја доколку Кан биде уапсен.

Тој вели дека Владата сакала да го убие Кан со загрозување на неговата безбедност преку судските рочишта.

Кан (70), единствениот премиер во земјата кој е соборен преку изгласување недоверба во 75-годишната политичка историја на Пакистан, се соочува со низа обвинувања, од тероризам до обид за убиство и перење пари. Парламентот изгласа недоверба во април минатата година.

Кан за неговото соборување од власт вели дека е заговор поддржан од САД, обвинување кое актуелната коалициска Влада во Исламабад и Вашингтон повеќе пати го отфрлија.

Тој избегна атентат додека водеше антивладин марш кон Исламабад во ноември. Оттогаш, тој престојува во својата резиденција во Лахоре и честопати ги прескокнуваше судските процеси поради здравствени и безбедносни причини.