Мирниот собир во Атина поради железничката несреќа прерасна во судир меѓу демонстраните и полицијата

АТИНА (АА) – Мирниот собир во Атина поради железничката несреќа во која загинаа најмалку 57 луѓе, се претвори во насилен, јавува Анадолу.

Собирот што го свикаа трите синдикати што ги претставуваат вработените во грчката железница, на кој присуствуваа и од главниот синдикат ПАМЕ, политичката партија на поранешниот министер за финансии, Јанис Варуфакис, MeRA25, како и други групи и левичарски партии, собраа илјадници луѓе на централниот плоштад Синтагма.

За време на мирниот дел од собирот насобраните извикуваа слогани и носеа транспаренти со кои се осудуваат властите и нивните економски политики за кои рекоа дека ја предизвикале трагичната несреќа.

Група, претежно млади лица, подоцна почна да фрла големи бекатон-плочки од тротоарите во близина, и Молотови коктели кон полицијата и на улиците.

Автобус и тешко градежно возило, како и многу контејнери за ѓубре, беа делумно или тешко оштетени од Молотовите коктели.

Кога полициските сили брзо реагираа со бибер-спреј, групата избега и се изгуби во тесните улици.

Во меѓувреме, премиерот Киријакос Мицотакис, преку Фејсбук, порача: „Како премиер, им должам на сите, но пред сè, на роднините на жртвите, големо извинување.“

„И лично, и во име на сите оние што владееле со земјата со години“, додаде тој.

Во вторникот вечерта, патнички воз се судри со товарен воз близу градот Темпи во северната провинција Лариса.

Според официјалните податоци загинати се 57 лица, меѓу кои многу студенти, како и деветмина железничари.