Песков: „Планот на Трамп не е во согласност со резолуциите на Советот за безбедност на ОН“

МОСКВА

Русија смета дека наводниот Мировен план на американскиот претседател Доналд Трамп не е во согласност со резолуциите на Советот за безбедност при Обединетите нации (СБОН), пренесува Агенција Анадолија (АА).

Гласноговорникот на Кремљ, Дмитриј Песков, гостуваше на телевизијата „Росија 1“, каде што даде коментар за наводниот Мировен план кој американскиот претседател Доналд Трамп го нарече „Договор на векот“, истакнувајќи дека СБОН има усвоено одлуки за палестинско-израелското прашање.

Песков рече дека „некои точки од планот не се во потполност во согласност со одлуките на СБОН“.

Американскиот претседател Доналд Трамп на 28 јануари, во друштво на израелскиот премиер Бенјамин Нетанјаху, во Белата куќа го откри таканаречениот Мировен план за Блискиот Исток кој предвидува Ерусалим да биде прогласен за неделив главен град на Израел.

Трамп порача дека неговиот план е последната шанса за формирање независна палестинска држава.

Израелскиот премиер Нетанјаху откри дека планот предвидува израелски суверенитет над сите еврејски населби на Западниот Брег и нагласи дека планот претставува многу голема и историска придобивка за Израел.

Палестинската страна, вклучително и движењата на отпорот, Фатах и Хамас, го отфрлаат планот на Трамп и најавуваат продолжување на борбата за правата на Палестинците.

Палестинскиот претседател Махмуд Абас го нарече планот заговор, а од Хамас порачаа дека планот не вреди ни колку хартијата на која е отпечатен.