Mustafa Deveci
20 Февруари 2020•Ажурирај: 20 Февруари 2020
ЕРУСАЛИМ (АА) - Израелскиот премиер Бенјамин Нетанјаху најави изградба на 5.200 нови станбени единици во две нелегални еврејски населби во окупираниот Источен Ерусалим, пренесува Агенција Анадолија (АА).
Нетанјаху зборуваше за новиот план за изградба на станбени единици во близина на нелегалната еврејска населба Хар Хома, во Источен Ерусалим (Кудс).
Израелскиот премиер изјави дека 2.200 станбени единици ќе бидат изградени во Хар Хома, а 3.000 во нелегалната еврејска населба Гиват Хаматос.
Израелските медиуми наведуваат дека со изградбата на нови станбени единици на подрачјето на Хар Хома ќе дојдат додатни 10.000 Евреи, со 40.000 колку што моментално живеат на тоа подрачје.
Одлуката на Нетанјаху доаѓа пред предвремените избори во Израел, планирани за 2 март.
Според податоците на Израелската организација за заштита на човековите права „Пис нау“ (Peace Now), во окупираниот Источен Ерусалим постојат 13 нелегални еврејски населби во кои живеат повеќе од 215.000 еврејски доселеници.
Меѓутоа, според податоците на невладините организации, израелските власти од окупацијата од 1967 година на Западниот Брег изградија повеќе од 250 нелегални еврејски населби во кои живеат повеќе од 400.000 еврејски доселеници. Станува збор за населби кои меѓународното право ги третира како нелегални.
