Alma Dekovic
27 Март 2024•Ажурирај: 28 Март 2024
ГАЗА (АА) - Палестински болничари вложуваат напори за да ги спасат животите на децата што тешко се ранети во израелските бомбардирања и гранатирања што траат од 7 октомври, пренесува Анадолу.
На снимката на Агенција Анадолу може да се види како медицинскиот персонал врши компресија на граден кош, што се смета за најважен дел на кардиопулмоналната реанимација (ЦПР), односно итна процедура за спасување животи што се изведува кога срцето ќе престане да чука.
Итното изведување на ЦПР може двапати или трипати да ги зголеми шансите за преживување бидејќи помага во одржувањето на движењето на крвта низ телото, давајќи им го на мозокот и на другите органи кислородот што им е потребен за да останат во функција.
Израелските сили веќе 172 дена изведуваат напади врз подрачјето на Појасот Газа, а меѓу последните е бомбардирањето на градот Џабалија, во северниот дел на палестинската енклава. Израелските воени авиони гаѓаа станбени подрачја, што резултираше со сериозни повреди на три лица, вклучително и деца.
Израел започна немилосрдни воздушни и копнени напади врз Појасот Газа со неселективно бомбардирање на цивилни населби, училишта, верски објекти и болници по неочекуваниот напад од страна на Хамас на 7 октомври минатата година.
Во овие напади досега се убиени повеќе од 32.414 Палестинци, главно деца и жени, а над 74.787 се повредени во услови на масовно уништување и недостиг на неопходни средства за опстанок.
По обвинението за геноцид што го поднесе Јужноафриканската Република, Меѓународниот суд на правдата на 26 јануари пресуди дека Израел мора да се воздржи од какви било активности поврзани со убивање, напади и уништување на жителите на Газа и да преземе мерки за спречување на геноцид.
И покрај тоа, израелските напади врз Појасот Газа продолжуваат со ненамален интензитет, а испораката на хуманитарна помош не е доволна за решавање на хуманитарната катастрофа.
Израел воведе целосна блокада на Појасот Газа, оставајќи го неговото население, особено жителите на Северна Газа, на раб на глад.
Според Обединетите нации, израелската војна принуди 85 отсто од населението на Газа на внатрешно раселување, каде што постои и акутен недостиг на храна, чиста вода и лекови, а 60 отсто од инфраструктурата на енклавата се оштетени или уништени.
