ОН се „згрозени“ од извештаите за нападот во Мјанмар во кој беа убиени 35 цивили

ЖЕНЕВА

Заменик-генералниот секретар на ОН за хуманитарни прашања и координатор за итна помош Мартин Грифитс во неделата изјави дека е „ужаснат“ од веродостојните извештаи за нападот врз цивили во Мјанмар во кој беа убиени 35 лица, јавува Агенција Анадолија (АА).

Грифитс зборуваше за инцидентот кој според наводите се случил на 24 декември во источната држава Кајах.

„Веродостојните извештаи велат дека најмалку 35 луѓе, вклучително и најмалку едно дете, биле принудени да излезат од возилата, биле убиени и изгорени“, изјави Грифитс.

„Го осудувам овој тежок инцидент и сите напади врз цивилите низ целата земја, кои се забранети според меѓународното хуманитарно право“.

Грифитс рече дека двајца хуманитарни работници на „Save the Children“ кои се нашле на местото на насилството и чие возило било нападнато и изгорено и понатаму се водат за исчезнати.

Тој ги повика властите во Мјанмар веднаш да започнат темелна и транспарентна истрага за инцидентот за да можат брзо да ги изведат сторителите пред лицето на правдата.

„Покрај тоа, ги повикувам вооружените сили на Мјанмар и сите вооружени групи во Мјанмар да ги преземат сите мерки за заштита на цивилите од штета“, рече Грифитс.

Тој рече дека милиони луѓе во Мјанмар се од очајна потреба од хуманитарна поддршка.

Бурманската војска, локално позната како Татмадау, покрена воен удар на 1 февруари и го затвори раководството на Националната лига за демократија (NLD) предводено од нобеловката Аунг Сан Су Чи, која претходно овој месец беше осудена на четири години затвор.

Повеќе од 1.000 луѓе се убиени, додека над 5.400 други се уапсени од страна на силите на хунтата, од кои многумина оттогаш се ослободени.