Нетанјаху ѝ нареди на израелската армија да започне интензивни напади врз Газа и покрај прекинот на огнот

ЕРУСАЛИМ (АА) - Израелскиот премиер Бенјамин Нетанјаху ѝ наредил на израелската армија да започне интензивни напади врз Газа и покрај прекинот на огнот, известува Анадолу.

Канцеларијата на израелскиот премиер објави дека Нетанјаху ја донел одлуката по спроведените безбедносни консултации.

Во соопштението се вели:

„Како резултат на безбедносните консултации, премиерот Нетанјаху ѝ наложи на војската веднаш да започне интензивни напади врз Појасот Газа“.

Во време кога било објавено соопштението, локалните медиуми информираа дека израелската армија започнала воздушен напад врз градот Рафа во јужниот дел на Појасот Газа.

Се тврди дека во Рафа во текот на денот било пукано кон израелските војници.

Нетанјаху свика состанок за безбедносни консултации и состанок на кабинетот за безбедност, тврдејќи дека Хамас „го прекршил договорот за прекин на огнот“.

Се тврди дека Израел би можел да ја прошири жолтата линија што ја држи под окупација во Појасот Газа и дека САД дале зелено светло за тоа.