Министерот Османи во посета на Украина: „Северна Македонија стои цврсто во поддршка на храбриот украински народ“

СКОПЈЕ (АА) - Министерот за надворешни работи на Северна Македонија, Бујар Османи, реализира работна посета на украинскиот главен град Киев, пренесува Агенција Анадолија (АА).

Според соопштението на МНР на Северна Македонија, Османи во овие рамки ќе оствари средба со шефот на украинската дипломатија, Дмитро Кулеба и содруги високи државни претставници на Украина.

„Предвидено е министрите да разговараат за руската воена агресија и начините како меѓународната заедница, вклучително и Северна Македонија, можат да помогнат“, се вели во соопштението.

Се истакнува дека во Киев Османи бил пречекан од амбасадорот на Северна Македонија, Крум Ефремов, кој деновиве се врати во украинскиот главен град и заедно со останатите членови на дипломатската мисија продолжува да ја врши својата функција.

Меѓу другото, Османи на социјалните мрежи објави фотографии од неговата посета на Киев.

„Тукушто допатував во Киев, каде што, покрај средбата со мојот колега Дмитро Кулеба, во функција повторно ќе ја ставиме и нашата амбасада во Украина. Северна Македонија стои цврсто во поддршка на храбриот украински народ“, напиша Османи на својот фејсбук-профил.