КИГАЛИ (АА) - Неидентификувани вооружени лица убија најмалку 50 цивили во градот Маџоари на истокот на Буркина Фасо, соопшти локален претставник, пренесува Агенција Анадолија (АА).

„Жителите на Маџоари во провинцијата Компиенга која граничи со Бенин се движеле кон Надиагу во градот Пама, бегајќи од насилство. Сепак, ги нападнале непознати вооружени мажи во близината на мостот Сингоу“, наведе во соопштението гувернерот на источниот регион, Хуберт Јамеого.

Изразувајќи сочувство до семејствата на починатите, Јамеого рече дека се во тек операции за да се воспостави мир. Додаде дека жителите на Маџоари се „под закана од тероризам“.

По последниот напад, бројот на жртви во тоа подрачје достигна речиси 80 лица во рок од само две недели.

Во нападот на цивили во истото подрачје на 14 мај загинаа 17, а ранети беа 7 лица. Во друг инцидент на 19 мај, во нападот на Воениот одред на Маџоари починаа 11 војници, а 20 се ранети.

Буркина Фасо се соочува со бунтови кои во текот на изминатата деценија се проширија од соседниот Мали.