Литванија ќе воспостави 44 локални центри за кибербезбедност за зајакнување на националната одбрана

ИСТАНБУЛ (AA) – Министерството за одбрана на Литванија денес го претстави планот за воспоставување 44 оперативни центри за кибербезбедност низ земјата, со цел да ја зацврсти националната дигитална одбрана во услови на растечки регионални киберзакани, јавува Анадолу.

Иницијативата, предводена од Националниот центар за кибербезбедност (NKSC), предвидува отворање регионални центри во сите окрузи во рок од три и пол години, изјави Рокас Јоникас, директор на Одделот за кибероперации, пренесе литванскиот радиодифузер ЛРТ.

Претходно годинава, општините во регионот Шјауљај потпишаа договор со НКСЦ за воспоставување на прв заеднички регионален центар за безбедносни операции – пилот-модел за националната мрежа.

Локалните власти велат дека центарот би можел да стане функционален до крајот на годинава.

Центарот во Шјауљај се очекува да ангажира четворица специјалисти кои ќе обезбедуваат кибербезбедносни услуги за седум општини, вклучувајќи мониторинг на дигиталната инфраструктура, откривање и евидентирање инциденти, како и зајакнување на ранливите системи.

Според поширокиот план, НКСЦ ќе ја обезбеди неопходната хардверска и софтверска опрема, како и обуки, додека општините ќе ги понудат просториите и ќе ги финансираат платите на вработените.

Центрите ќе играат и клучна улога во управувањето со големи киберинциденти, обезбедувајќи координација меѓу локалните и националните институции.

Официјални лица велат дека мрежата значително ќе ја засили киберотпорноста на јавниот сектор во Литванија, обезбедувајќи дека капацитетите за откривање закани и одговор на инциденти ќе бидат достапни низ целата земја, а не само во главниот град.