Лавров: Украинскиот претседател ги прогласи мировните преговори со Русија за кривично дело

МОСКВА (АА) - Рускиот министер за надворешни работи, Сергеј Лавров, денес изјави дека украинскиот претседател, Владимир Зеленски, ги прогласил преговорите со Москва за „кривично дело“, јавува Анадолу.

Говорејќи на конференцијата „Раисина дијалог“ во Њу Делхи, Лавров рече дека сите прашуваат кога Русија ќе биде подготвена да преговара за завршување на војната што започна во февруари 2022 година, но дека никој не ја поттикнува Украина на мировни преговори.

Тој потсети дека главниот спонзор на Украина, Западот, постојано вели дека „сè уште не е време да се преговара бидејќи Украина мора да победи на бојното поле пред какви било преговори“.

„Никој не го повикува Зеленски, не прашува кога тој ќе преговара. Меѓутоа требаше да знаете, подготвувајќи ја оваа тема на оваа средба, дека во септември минатата година, Зеленски потпиша декрет, што го прави кривично дело преговарањето со Русија сè додека Владимир Путин е претседател.“

„Значи, можете ли да го решите ова прашање, можете ли да го прашате што прави?“, изјави Лавров.

Рускиот министер нагласи дека Русија со децении предупредува дека Западот треба да го запре ширењето на НАТО и да ѝ обезбеди оружје на Украина за да ја подготви за војна со Русија.

Тој ги цитираше зборовите на американскиот претседател Џо Бајден, американскиот државен секретар и на шефот на НАТО, Јенс Столтенберг, дека „Русија мора да претрпи стратешки пораз на бојното поле“, што е „егзистенцијално“ за глобалната доминација на Западот.

„Ова е многу грубо признание, би рекол“, истакна Лавров.

Рускиот министер за надворешни работи рече дека западните земји се обиделе да ја вклучат ситуацијата во Украина во декларацијата за министерскиот состанок на Г-20, но безуспешно, бидејќи групата никогаш не рефлектирала во своите декларации други конфликтни ситуации, вклучително и во Ирак, Либија и Авганистан или Југославија.

„Г-20 беше формирана во 1999 година на ниво на министри за финансии и директори на централни банки... На никој не му беше гајле за ништо освен за финансиите и макроекономските политики, за кои беше формиран Г-20.

Лавров рече дека Русија никогаш нема да се потпре на Западот по војната во Украина, туку ќе се фокусира на градење односи со „сигурни“ партнери.

Тој смета дека во моментов се прави сè за Европа да се сведе на ниво на подреден играч на САД, да се поткопа конкурентската предност на Европа и да се уништат економските врски меѓу Русија и Европската Унија.

„Нека биде тоа така, ако тоа е нивен избор“, рече тој.

„Руската енергетска политика ќе биде насочена кон сигурни партнери, а меѓу нив секако се и Индија и Кина“, рече Лавров.