Захарова демантира дека Лавров и Блинкен разговарале за размена на затвореници

МОСКВА (АА) - Портпаролката на руското Министерство за надворешни работи, Марија Захарова, денес демантираше дека шефовите на руската и американската дипломатија разговарале за размената на американскиот државјанин Пол Вилан, кој во Русија служи затворска казна поради шпионажа, пренесува Анадолу.

Захарова на Телеграм ги нарече „лажни“ изјавите на портпаролот на американскиот Стејт департмент, Нед Прајс, кој рече дека државниот секретар Ентони Блинкен „дал сериозен предлог“ за размената на Вилан за време на краткиот разговор со рускиот министер за надворешни работи, Сергеј Лавров, на маргините на министерскиот состанок на Г-20 во Њу Делхи.

„Ох, колку интересно. Го прашав Сергеј Викторович (заб. ав. Лавров) дали Блинкен вчера ја споменал темата за Вилан. Излезе дека американскиот државен секретар не го ни споменал. Сè што вчера Стејт департментот објави дека Блинкен изразил загриженост за ситуацијата во која е вклучен американски државјанин е лага. Неверојатно однесување на американската администрација“, рече Захарова.

Таа додаде дека Блинкен „побарал контакт со Лавров“, а двајцата дипломати потоа разговарале „во одење“.

Судот во Москва во јуни 2020 го осуди поранешниот американски маринец Вилан на 16 години затвор, прогласувајќи го за виновен за шпионажа. Вилан се изјасни за невин и рече дека ќе поднесе жалба на казната.

Федералната служба за безбедност го приведе во Москва во декември 2018 година.