ИСТАНБУЛ (АА) - Израелските сили убија речиси 60 Палестинци во воздушните напади пред зори врз Појасот Газа, меѓу кои имало жени и деца, според локалните медиуми денес, јавува Анадолу.

Официјалната палестинска новинска агенција Вафа јави дека израелските воени авиони погодиле станбени згради и бегалски камп во градот Џабалија, во северниот дел на Појасот Газа, при што загинале најмалку 45 Палестинци.

Се додава дека спасувачите на цивилната заштита се борат со ограничени можности за извлекување на жртвите од урнатините на погодените згради.

Во јужниот дел на Појасот Газа, еден маж, неговата сопруга и нивните две ќерки беа убиени во израелски напад врз нивниот шатор во областа Ал-Маваси во Кан Јунис.

Исто така, во југоисточен Кан Јунис, во израелски воздушен напад врз куќа во областа Ал-Фухари се убиени 10 лица од семејството Абу Амуна, според локалното радио Ал-Акса.

Речиси 52.900 Палестинци се убиени во Газа во израелските напади од октомври 2023 година, повеќето од нив жени и деца.

Меѓународниот кривичен суд во ноември издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата поради својата војна во енклавата.