Израел им нареди на Палестинците во северна Газа да се евакуираат пред интензивираните напади

ЕРУСАЛИМ/ИСТАНБУЛ (АА) - Израелската Армија им нареди на палестинските цивили во северните градови Џабалија и Беит Лахија во Газа да се евакуираат денес пред интензивираните напади во областа, јавува Анадолу.

Портпаролот на Армијата, Авичај Адрае, изјави дека жителите на 14 населби во двата града „мора веднаш да се евакуираат на југ“.

Адрае на својот профил на X предупреди дека Армијата значително ќе ги прошири своите воени операции во одредените области, кои ги нарече „опасни борбени зони“.

Отфрлајќи ги меѓународните повици за прекин на огнот, израелската Армија спроведува брутална офанзива во Газа од октомври 2023 година, во која се убиени речиси 53.800 Палестинци, повеќето жени и деца.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.