Најмалку 20 загинати, петмина исчезнати во пожар на товарен брод во Кина

Најмалку 20 лица загинаа, а петмина се водат како исчезнати откако избувна пожар на товарен брод во Источна Кина, објави државната новинска агенција Синхуа, пренесува Анадолу.

Пожарот на странскиот товарен брод избувнал додека се вршело негово одржување во бродоградилиштето „Кингдао Беихаи“ во градот Кингдао, во провинцијата Шандонг, околу 11:15 часот по локално време.

Најмалку 42 лица се наоѓале на бродот кога избувнал пожарот.

По несреќата, кинескиот претседател Си Ѓинпинг повика на „чекори за спречување на големи несреќи“.

Си ја истакна потребата од „забрзување на потрагата и спасувањето на исчезнатите лица, соодветно справување со последиците и обезбедување утеха и поддршка, како и итно истражување на причината за несреќата и повикување на одговорност на виновните во согласност со законот“.

Министерството за управување со вонредни состојби испрати тим на местото на настанот, а локалните власти на Шандонг ги мобилизираа ресурсите за целосно спроведување на активностите за справување со инцидентот на терен.

Си изјави дека сите региони и надлежни служби „треба да извлечат длабоки поуки“ од овој инцидент и „темелно да ги истражат и отстранат сите видови опасности од пожар“.