Езидите кои се протерани од своите домови од страна на ПКК, го осудуваат молкот на меѓународната заедница

ДУХОК (АА) - Езидската заедница која не може да се врати во своите домови поради присуството на ПКК во регионот Синџар во северен Ирак, се мачи да преживее во камповите во Духок, град во областа на регионалната влада на Курдистан (КРГ), јавува Агенција Анадолија (АА).

Езидите од Синџар во изјава за AA ја осудија рамнодушноста на меѓународната заедница за потешкотиите со кои се соочувале поради угнетувањето од страна на терористичката организација ПКК.

Езидите, кои мораа да ги напуштат своите домови откако терористичката група ДЕАШ изврши напад врз областа Синџар во Мосул во 2014 година, веќе осум години живеат во кампови под тешки услови.

Откако ПКК ги избрка од своите домови, огромно мнозинство од заедницата живее во шатори, и покрај неповолните временски услови во летниот и во зимскиот период.

Езидите го чекаат спроведувањето на Синџарскиот договор од 2020 година, а една од главните цели е елиминација на терористите на ПКК во регионот.

Во октомври 2020 година, ирачката федерална влада и КРГ во северен Ирак потпишаа договор за зачувување на безбедноста во Синџар од страна на ирачките федерални безбедносни сили во координација со силите Пешмерга на КРГ.

Езидите ги повикаа меѓународните институции да им помогнат да го прекинат својот номадски живот и да создадат соодветни услови за да се вратат во своите родни места.

Емин Бахри Ибрахим, кој се засолни во бегалскиот камп Шарија во Духок, рече дека морал да го напушти својот дом во Синџар двапати во последните седум години.

„Го повикуваме светот од 2014 година, но никој не го слуша нашиот глас. Очекуваме да се подобрат условите во Синџар и илегалните организации (ПКК) да го напуштат нашиот град. Така можеме да се вратиме назад“, изјави Ибрахим за АА.

„Суперсилите во светот и организациите за човекови права не се заинтересирани за нашите проблеми. Езидите беа изложени на прогон, но меѓународната заедница и ирачката влада не се грижеа за нас“, рече Фајсал Осман Решо, припадник на Езидите од Синџар.

Решо ги обвини ОН, организациите за човекови права, ирачката влада и другите институции дека остануваат рамнодушни кон проблемите на Езидите, и додаде: „Нашата ситуација не може да биде полоша од оваа“.

Тој го повика ирачкиот парламент да одржи специјална седница за состојбата на Езидите и да најде итно решение за нивните проблеми.

- Како терористичката ПКК се зацврсти во Синџар?

Терористите на ДЕАШ го нападнаа Синџар, регион со мнозинско население Езиди, во август 2014 година.

Терористичката организација киднапираше и уби илјадници луѓе, вклучувајќи жени и деца, или ги приведе во областите под нејзина контрола.

Терористичката организација ПКК успеа да воспостави упориште во Синџар во 2014 година под изговор дека ја штити заедницата Езиди од терористите на ДЕАШ.

Синџар има стратешка позиција бидејќи е на околу 120 километри од Мосул и блиску до турско-сириската граница.

Терористичката организација има за цел да создаде коридор меѓу терористите на ЈПГ/ПКК во северна Сирија и северниот ирачки регион Кандил.

Во својата повеќе од 35-годишна терористичка кампања против Турција, ПКК која е на листата на терористички организации на Турција, САД и ЕУ, е одговорна за смртта на над 40.000 луѓе, вклучувајќи жени, деца и доенчиња.