Aida Cako
12 Јуни 2025•Ажурирај: 18 Јуни 2025
ХАН ЈУНИС (АА) - Децата во Појасот Газа преземаат одговорности за возрасни, со цел издршка на своите семејства, додека израелските напади продолжуваат дваесетти месец по ред, а условите за живот се влошуваат, јавува Анадолу.
По повод Светскиот ден против детскиот труд, кој беше одбележан вчера, многу деца беа видени како работат на пазарите и улиците наместо да одат на училиште или да си играат.
Ова се случува во услови на тековниот конфликт и заострената блокада по воената кампања на Израел, која започна на 7 октомври 2023 година.
Со границите кои во голема мера се затворени и ограничената помош, семејствата се соочуваат со ограничени опции за преживување, со што децата се принудени да извршуваат физички тешки задачи кои не се соодветни за нивната возраст.
УНИЦЕФ на 16 март предупреди дека децата во Газа се соочуваат со „екстремно вознемирувачки“ услови, живеат во постојан страв и вознемиреност и немаат пристап до хуманитарна помош и заштита.
Во Хан Јунис, децата биле забележани како мелат наут за фалафел, влечат колички и продаваат овошје и грицки во близина на засолниште за раселени лица за да помогнат во обезбедувањето храна за своите домаќинства.
Најмалку 55.207 Палестинци се убиени во геноцидната војна на Израел во Појасот Газа од октомври 2023 година, соопшти Министерството за здравство денес.
Израелската Армија продолжи со нападите врз Појасот Газа на 18 март и оттогаш уби 4.924 луѓе, а повреди 15.780 други, со што го прекрши договорот за прекин на огнот и размена на затвореници што стапи на сила во јануари.
Во ноември минатата година Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант поради воени злосторства и злосторства против човештвото во Газа.
Израел е обвинет за геноцид пред Меѓународниот суд на правдата за неговите постапки во енклавата.
