Анкета: Над 50 отсто од Израелците претпочитаат договор за размена на заложници од инвазија на Рафа

КУДС/ЕРУСАЛИМ (АА) - Повеќе од половина од Израелците претпочитаат договор за прекин на огнот со Хамас, вклучително и размена на заложници, отколку воена операција во градот Рафа, во јужниот дел на Појасот Газа, покажа анкетата објавена денес, јавува Анадолу.

Анкетата ја спроведе приватниот институт за истражување „Лазар“ на случаен примерок од 500 Израелци, а беше објавена од израелскиот дневен весник „Маарив“.

Таа покажа дека „54 отсто од анкетираните Израелци претпочитаат постигнување договор за заложниците отколку воена операција во Рафа“.

Анкетата, исто така, забележа дека „79 отсто од гласачите за десничарските партии ја поддржуваат операцијата во Рафа, во споредба со 81 отсто од гласачите за левичарските и центристичките партии кои претпочитаат договор за размена на заложници“.

Според анкетата, „38 отсто претпочитаат воена операција наместо постигнување договор, додека 8 отсто немаат конкретно мислење за ова прашање“.

Се појавија извештаи за предлог за прекин на огнот меѓу Израел и палестинската група на отпорот Хамас за ставање крај на конфликтот во Појасот Газа.

Но, израелскиот премиер Бенјамин Нетанјаху вети дека ќе се изведе напад во Рафа, во која се засолнети 1,4 милиони раселени Палестинци, со или без договор со Хамас.

Хамас, за кој се верува дека држи над 130 израелски заложници, бара прекин на смртоносната офанзива на Израел врз Појасот Газа во замена за договор за заложниците.